Novas

Valoración dos acordos adoptados na Reunión de Ministras e Ministros da UE perante do sector lácteo

• 24,Mar 2009
• Posted By : sicom
• 0 Comments

1. As medidas de apoio á exportación e ó almacenamento privado de leite adoptadas non van resolver a grave situación que o sector lácteo galego está a sufrir pola baixada xeneralizada de prezos, senón que a van profundizar.

2. Nese sentido, consideramos que o MARM perdeu a oportunidade de apoiar medidas como as que o Goberno alemán quería comezar a debater e que organizacións agrarias coma o Sindicato Labrego Galego vimos reivindicando historicamente, e dicir, centrar o debate e as solucións no establecemento dun prezo mínimo que cubra custos de produción e o traballo.

3. Cómpre que a ministra Elena Espinosa dea marcha atrás nas medidas que apoiou no seu día no Chequeo Médico da PAC, tales como aumentar liñalmente a cota de produción de leite en Europa e liberalizar totalmente o mercado coa desparición do control da produción, xa que este tipo de iniciativas son as que están a provocar que teñamos importacións masivas de leite a baixos prezos.

4. As vías de solución teñen que vir pola redistribución das cotas europeas con criterios sociais e o establecemento de prezos mínimos, para acadar deste xeito unha produción de leite ordenada e a vertebración do territorio en toda a Unión Europea.

5. Agardamos que camiños e debates como os que onte se abriron no Consello de Ministras/os da UE sirvan tamén para reorientar a Política Agraria Común (PAC) cara o regulamento das marxes comerciais para a distribución que impliquen prezos xustos para a alimentación da sociedade e para poder vivir dignamente do noso traballo os labregos e labregas.