No marco da Xira Pola Vida iniciada polo Exército Zapatista de Liberación Nacional (EZLN) en Vigo o pasado mes de xuño, temos a oportunidade de contar agora na Galiza con Mª de Jesus Patricio, Marichuy, a primeira persoa en ser elixida polo CNI para presentarse a unhas eleccións federais mexicanas, na convocatoria do ano 2018. Este proceso histórico para os pobos indíxenas e os pobos en resistenza no seu conxunto ficou recollido no documental La Vocera, da cineasta Luciana Kaplan.
Esta defensora dos dereitos humanos de orixe nahua é ademais unha referencia en toda Abya Yala (América Latina) polo traballo desenvolvido no ámbito da menciña tradicional, a súa defensa dos dereitos das mulleres e a loita contra o espolio dos recursos naturais e a conseguinte expulsión da poboación rural das áreas nas que viven.
Tamén grande coñecedora dos procesos de articulación social para facer fronte á destrución da minaría, megaparques eólicos, presas e demais actividades extractivas cas que as empresas que acaparan o negocio enerxético e de combustíbeis a nivel mundial están a provocar a destrución dos ecosistemas globais é Nisaguie Abril Flores, indíxena binnizá activista da Asamblea de los Pueblos Indígenas del Istmo en Defensa de la Tierra y el Territorio.
O Istmo de Tehuantepec, no Estado de Oaxaca, unha das zonas con maior presenza de pobos indíxenas en todo México -comunidades ikoots e biniza’a-, é un espazo natural estratéxico que se atopa baixo a ameaza do denominado Megaproyecto del Itsmo, que inclúe, entre outras intervencións, un tren interoceánico e varias decenas de parques eólicos, algúns deles operados por empresas do Estado español.
Dende o Sindicato Labrego Galego, integrante da Rede Galega Stop Eólicos, Contraminacción e organización articulada tamén na loita contra a contaminación das augas e o acaparamento de terras no noso país, valoramos como unha oportunidade moi importante o poder intercambiar experiencias e coñecemento con estas dúas mulleres defensoras dos ecosistemas e da Natureza na súa totalidade, da que tamén formamos parte os seres humanos.
Na liña da acción global contra os impactos na saúde do planeta infrinxidos polo capitalismo neoliberal, convocamos a tódalas persoas interesadas a achegarse aos espazos que poderemos compartir con estas dúas mulleres referentes na loita pola Vida.
Baixo a convocatoria “Resistencias ao extractivismo e a minaría en México e Galiza. Autoorganización popular e autogoberno indíxena”, Mª de Jesus Patricio, Marichuy, e Nisaguie Abril Flores participarán nos seguintes actos abertos:
Mañá, MARTES 16 de novembro:
16:30H Roteiro guiado pola Plataforma Veciñal MINA Touro o Pino NON. Punto de encontro Dona Dana (Touro).
20:00H Charla Coloquio no local do SLG de Compostela R/ Ofelia Nieta (Meixonfrío) 13 – 23. Organiza: Plataforma Veciñal MINA Touro O Pino NON, Sindicato Labrego Galego (SLG) e Fundación Montescola.
MÉRCORES 16 de novembro:
13:00H Charla Coloquio en Compostela, no Salón de Graos da Facultade de C.C. Políticas. Modera: María Teresa Ponte Iglesias. Catedrática de Dereito Internacional Público e Relacións Internacionais.
19:00H Charla coloquio en Vigo, na biblioteca da Universidade Popular, Garcia Barbón nº 5.
17 Xuñ 2025
13 Xuñ 2025
30 Mai 2025
28 Mai 2025
27 Mai 2025
23 Mai 2025