A raíz da confirmación de circulación no sur de Galiza do virus da lingua azul o 17 de Febreiro de 2023 e á modificación dos anexos I e II da Orde APA/1251/2020, foi activada na Galiza a campaña de vacinación e medidas de control e erradicación desta enfermidade, sendo unha vez máis varias as granxas que se viron afectadas con incidencias relevantes no gando vacinado -de xeito diferenciado mortes e problemas no ciclo xestante que están dando lugar á momificación de fetos, abortos, infertilidade…-.
A Secretaria Xeral do Sindicato Labrego Galego-Comisións Labregas (SLG-CCLL), a gandeira Isabel Vilalba, vén de dirixirse á Consellaría do Medio Rural para solicitar unha xuntanza ca persoa responsábel da área de vacinación animal a fin de concretar o grao de incidencias e afrontar unha posible solución a esta problemática.
Ademais dos prexuízos derivados das perdas económicas asociadas a estes casos detectados na cabana gandeira vacinada, as gandeiras e gandeiros están especialmente preocupadas pola persistencia de reaccións adversas á vacina, xa denunciadas anteriormente, recoñecidas pola propia Administración, e que motivaron unha modificación nas pautas de vacinación, que pasou a ser voluntaria no ano 2011.
Cabe lembrar que os primeiros casos desta enfermidade na Galiza foron detectados na zona da Mariña no ano 2008, e xa dende o inicio das campañas da vacinación o sector gandeiro a nivel de todo o Estado alertou no ano 2009 das consecuencias negativas que esta inoculación estaba a causar nos animais, chegando a superar as perdas por mor destes efectos as propias consecuencias derivadas da enfermidade en si mesma.
O SLG-CCLL vén denunciando esta situación dende o seu inicio, mantendo no ano 2010 unha xuntanza co Director Xeral de Gandaría para demandar unha actuación urxente por parte da Administración e animando ás granxas a denunciar esta problemática. En xaneiro do ano 2011 a vacina deixou de ser obrigatoria para todas as explotacións. A día de hoxe a vacina é obrigatoria en zonas onde se detectan casos de lingua azul.
IMAXE: Diario Sur 2014
17 Xuñ 2025
13 Xuñ 2025
30 Mai 2025
28 Mai 2025
27 Mai 2025
23 Mai 2025