Ademais, o propio conselleiro de medio rural está a promover estas chantaxes anunciando prioridade nas axudas a aquelas explotacións que, sen ter garantido un prezo para poder vivir, asinen a súa desfeita mediante contratos homologados.
Dende o SLG valoramos que a proposta do acordo de Madrid foi unha estratexia para afastar ao Goberno español e galego da súa responsabilidade e estrelar o conflito contra as industrias. Mais a solución á crise do sector leiteiro, non deixaremos de repetilo, é política.
Ao fío desta idea clave, é dicir: que o noso problema solucionarase o día que, por acordo político se estableza normativamente un prezo mínimo para un produto de primeira necesidade como é o leite, Carme Freire Cruces -Secretaria Xeral do SLG- deu conta en rolda de prensa celebrada na mañá de hoxe en Compostela, das vindeiras mobilizacións que levará adiante o sector leiteiro.
Cuestións para nós fundamentais: o prezo do leite, a redución e control da produción na UE e a posibilidade de aumentar as axudas directas dos estados ao sector leiteiro, van ser abordadas o vindeiro 7 de setembro en Bruxelas nunha reunión de ministros e ministras de agricultura da UE.
Mais, onde vai estar a “nosa” ministra? Inaugurando un curso de verán en Santander.
E onde vai estar o sector leiteiro da Galiza? En Santander, transmitíndolle de preto que condenamos a súa actitude totalmente irresponsábel e que esiximos unha aposta política clara por parte do seu ministerio para resolver os problemas que están nos están abocando á desfeita do sector.
Dende o SLG apelamos á responsabilidade do presidente do Goberno español, José Luis Rodríguez Zapatero, para que a persoa que asista a dita reunión defenda o posicionamento do Estado, que é o que se recolle na resolución 173/000060, acordada por unanimidade no Parlamento español o pasado 29 de abril*, (punto nº3: “Defender no seno da UE o impulso de normativas destinadas a mellorar a regulación do prezo de referencia do leite de xeito que se teñan en conta criterios coma os custes de produción”).
A actitude do Goberno é de escandalosa neglixencia, logo de catro meses dende que en abril o Parlamento instara a o Executivo a actuar, este segue obviando a súa responsabilidade e, como consecuencia, provocando a desaparición de miles de explotacións leiteiras.
Dende o SLG preguntámonos: que vai defender o Goberno español o día 7 de setembro en Bruxelas?
As gandeiras e gandeiros da Galiza sabemos perfectamente que os gobernos teñen que traballar para a cidadanía, e non ao revés. As normas elabóranse, modifícanse, derróganse… Son un corpus regulador vivo, porque aspiran a establecer marcos normativos para vivir, e é laboura das persoas que traballan nas institucións políticas ilas modelando en función das necesidades das persoas, dos pobos, non das empresas nin do mercado.
*Arquivo de audio co anuncio de mobilizacións. Carme Freire Cruces, Secretaria Xeral do SLG.
17 Xuñ 2025
13 Xuñ 2025
30 Mai 2025
28 Mai 2025
27 Mai 2025
23 Mai 2025