Novas

Inicio de mobilizacións para esixir solucións para as granxas excluídas das axudas ao sector ecolóxico e zonas desfavorecidas

• 16,Dec 2022
• Posted By : sicom
• 0 Comments

A Secretaria Xeral do Sindicato Labrego Galego-Comisións Labregas (SLG-CCLL), Isabel Vilalba, acompañada por arredor de 200 produtoras e produtores de ecolóxico, solicitou esta mañá en Lugo unha xuntanza urxente co Conselleiro de Medio Rural (CMR), José González Vázquez, para a trasladar a alarma xerada no sector ecolóxico ante as informacións, saídas da propia Consellería, da falta de fondos previstos para facer fronte ao total de solicitudes para a línea de ecolóxico da PAC 2022.

Este ano acadouse a incorporación de 150 novas granxas ao modelo ecolóxico, as cales viñéronse a engadir ás 100 explotacións que non puideron solicitala anteriormente, e ás que xa viñan solicitando o ano anterior. A piques de rematar o ano, e despois de promocionar dende a propia CMR a existencia de axudas para facilitar esta transición de convencional a ecolóxico, trasládaselle ao sector, 6 meses despois da solicitude da PAC, que faltan máis de 2 millóns de euros para estas axudas. Esta intolerábel carencia de previsión e de respecto por parte da Consellería de Medio Rural cara o sector de ecolóxico porá en entredito a viabilidade económica de multitude destas granxas e pequenos proxectos agro ecolóxicos.

Estas dificultades viranse a engadir ademais en moitos casos ás derivadas da decisión da Consellaría de excluír 8.255 granxas do acceso ás axudas por zona desfavorecida.

No escrito rexistrado esta mañá, a Secretaria Xeral do SLG demandou a subsanación inmediata das consecuencias da ausencia de planificación por parte da CMR, ampliando a partida adicada á produción ecolóxica garantindo que todas as persoas solicitantes podan acceder a este pago e que baixo ningún caso poida ser un motivo de denegación a falta de fondos, así como a rectificación urxente e inclusión para o novo periodo da PAC (2023-2027) dos pagos para zona desfavorecida (pagos distintos as zonas de montaña) ao total dos concellos calificados como tal.

Ca acción desta mañá en Lugo dende o SLG-CCLL damos inicio a unha campaña de mobilizacións en todo o país esixindo a subsanación da xestión discriminatoria destes orzamentos públicos realizada pola Consellaría do Medio Rural en detrimento das pequenas e medianas explotacións ecolóxicas e en zonas desfavorecidas.