Novas

A Secretaría das Mulleres organiza a “Xornada contra as violencias machistas” tras unha campaña formativa no rural

• 22,Nov 2016
• Posted By : sicom
• 0 Comments

Previamente á celebración do 25 de novembro, a Secretaría das Mulleres do SLG desenvolveu unha intensa campaña formativa dirixida a labregas e mulleres do rural con obradoiros como “Para que falar de sexo e de xénero”, “Somos máis que corpo-máquina” ou “Porque as mulleres se rebelan?” que chegaron até concellos e localidades de toda Galiza como Arzúa, Muxía, A Estrada, Friol, Póboa de San Xiao (Láncara), Teixeiro (Curtis), Lalín, Meira, Chantada ou Vilalba.

Ademais, a Secretaría das Mulleres volverá participar activamente na mobilización convocada o 25 de novembro pola Marcha Mundial das Mulleres e outras organizacións feministas na Galiza para denunciar a inacción dos poderes públicos diante desta lacra, e esixir cuestións para nós básicas como que a loita contra o terrorismo machista sexa unha cuestión de estado, ou que a prevención sexa unha política prioritaria para a que non se escatimen medios e financiamento.

Neste marco de colaboración con outras organizacións e entidades, a Secretaría das Mulleres do SLG tamén apoia a iniciativa comezada o ano pasado polo Concello de Santiago baixo o slogan “En negro contra a violencia”, cuxo obxectivo é promover e evidenciar o forte rexeitamento social que suscita na cidadanía calquera tipo de violencia contra as mulleres. A acción consiste en tinguir de negro os escaparates de 17 cidades e vilas (Santiago de Compostela, Ames, A Coruña, Ferrol, Lugo, Ribadeo, Sarria, Vilaba, Zas, Cangas, Carballo, Poio, Sada, Teo, Tui e Pontevedra) vestindo de loito os manequíns e expoñendo roupa negra en sinal de loito por todas as mulleres que sofren violencia machista e como resposta á máis dura das súas consecuencias: a morte.

Tentamos con toda esta actividade, dende a Secretaría das Mulleres do SLG, contribuír á loita colectiva contra unha lacra que alimenta estatísticas como que o 13% das mulleres en España menores de 16 anos teñan sufrido violencia física ou sexual nalgún momento da súa vida por parte da súa parella ou ex-parella, disparándose a porcentaxe ao 26% cando falamos de violencia psicolóxica de control e ao 20% se é violencia psicolóxica emocional. E o peor de todo é que só en 2016 xa foron asasinadas 46 mulleres en España das cales dúas eran galegas: Ana Gómez Nieto (12/02/16 en Becerreá) e Tatiana Vázquez Abuín (10/04/16 en Lugo). Por elas, por nós, dende a Secretaría das Mulleres do SLG seguiremos activamente en loita contra calquera forma de violencia que teña mulleres como vítimas non só o 25 de novembro, senón todos os días do ano como fixemos até agora a través do contacto permanente coas nosas afiliadas e coa nosa rede de oficinas Punto Delas, a través das cales asesoramos e prestamos apoio e axuda ás mulleres do rural que sofren violencia.