O encontro iniciouse coa exposición que os cargos da Consellaría de Medio Rural fixeron do traballo desenvolvido no ano 2010 en materia de transxénicos: accións relacionadas coa parcela experimental de Mesía, o posicionamento unánime das comunidades autónomas en relación ás recomendacións en materia de coexistencia da Comisión Europea, ou a asistencia á comisión nacional de bioseguridade.
Aínda que esta parte do encontro foi positiva, así como o intercambio de pareceres, propostas e inquedanzas posterior; a Plataforma Galega Antitransxénicos botou de menos que a Xunta de Galiza siga sen posicionarse politicamente nunha cuestión tan transcendental para a nosa seguridade alimentaria coma os organismos xeneticamente modificados. Para a PGA, de pouco serve o traballo técnico desenvolvido pola Consellaría de Medio Rural, se o Goberno Galego non fai pública a súa posición diante dos transxénicos. Ademais, dende a PGA preguntámonos en base a que posicionamento e directrices políticas se están a desenvolver todo o traballo e decisións técnicas realizados pola Consellaría de Medio Rural en materia de transxénicos.
En relación ao devandito, a Plataforma fixo unha chamada de atención diante da pasividade demostrada pola Xunta á hora de pór en práctica o acordo unánime, votado favorablemente polas tres forzas políticas do Parlamento de Galiza, de cara a realizar campañas formativas, informativas e de sensibilización coa problemática dos transxénicos entre a poboación galega; ou a establecer canles de comunicación estables entre a Administración e a sociedade civil neste particular. Diante destes feitos, @s representantes da PGA instaron a Ulloa e a Lamelo a transmitir as súas queixas ao Executivo Galego, e reclamaron que este se exprese e comece a desenvolver as accións acordadas polo Parlamento de Galiza en relación cos transxénicos e cuxa execución lle foi solicitada xa en reiteradas ocasións, sen ter obtido aínda unha resposta.
17 Xuñ 2025
13 Xuñ 2025
30 Mai 2025
28 Mai 2025
27 Mai 2025
23 Mai 2025