Novas

A afiliación do SLG debate propostas para a promoción dunha agricultura labrega na PAC2013

• 22,Mar 2010
• Posted By : sicom
• 0 Comments

Afiliadas e afiliados do SLG estamos a analizar como nos afectará a PAC2013 para extraermos as propostas que como Sindicato trasladaremos a tódalas instancias políticas, xa que demandamos participar activamente na construción da política agraria que rexerá os mercados e modos de produción na UE.

A presidencia do Estado español na U.E. no propio momento en que se está a deseñar as novas políticas para o subministro de alimentación en Europa, é unha oportunidade inmellorábel para comprobarmos con que tipo de agricultura e alimentación se compromete o Goberno central.

É por isto que as labregas e labregos do SLG estaremos pendentes da recollida e traslado das nosas propostas aos órganos decisorios da Unión Europea neste ámbito, nomeadamente a Comisión de agricultura, o Consello Agrícola e as diferentes reunións dos e das representantes políticas de cada país vinculadas ao eido agrario.

A actitude do Goberno galego, pola súa banda, poderemos testala xa nesta semana, xa que comprometeuse a defender en tódolos ámbitos de debate político as premisas consensuadas e achegadas polas tres organizacións sindicais agrarias, incluíndoas no documento que presentará ao sector produtor o vindeiro xoves 25, ás 17:00hrs., no marco do Consello Agrario (na Sociedade de Desenvolvemento Comarcal, estrada de Noia, km3, A Barcia).

Agricultura labrega

Entre os obxectivos discutidos e que se están a revelar nesta ronda de debates comarcais coma fundamentais na elaboración da vindeira PAC 2013, destacan os seguintes:

• Manter e desenvolver unha agricultura labrega que alimente á poboación, preserve o medio ambiente e as paisaxes, e garanta alimentos sans.

• Para que este primeiro punto sexa posíbel, a política agraria haberá de garantir prezos estábeis para os nosos produtos, remunerando tamén a función de coidadoras do medio que realizan as labregas e labregos.

• Relocalizar en territorio europeo a produción de alimentos que vai ser consumida na UE, en troques de manter o actual transporte de alimentos que poderían ser producidos aquí, dende outros países a máis baixo custo económico para as multinacionais.

• Rematar co dominio mundial das industrias e da grande distribución na cadea alimentaria dos pobos.

Para acadarmos os obxectivos enunciados, as labregas e labregos do Sindicato Labrego Galego demandamos as seguintes ferramentas:

1. O control da produción mediante o establecemento de mecanismos de equilibrio entre oferta e demanda.

2. Regular os mercados inhabilitando os acordos tomados na Ronda de Uruguay  no 1994, e que na actualidade obrigan a tódolos países europeos a importar de fóra da UE un 5% de tódolos produtos, haxa ou non produción dos mesmos nos países comunitarios.

3. Cesar o emprego de diñeiro público para axudar á exportación de produtos europeos, posto que está a influír á baixa no prezo dos produtos nos países de acollida.

Pola outra banda, cómpre tamén manter ou aumentar a preferencia comunitaria mediante o sistema de aranceis (impostos que equilibran os prezos de fóra da UE -máis baixos- cos de dentro), rompendo a tendencia actual, na que nos atopamos nos nosos mercados coa entrada de alimentos a moi baixo prezo, mais que foron producidos a costa dun grande custo social e ecolóxico.

1. Acadar a total transparencia da cadea alimentaria, establecendo un prezo mínimo para o sector produtor e limitando as marxes de beneficio da distribución e industria, garantindo aos consumidores/as a non especulación cos produtos alimentares.

2. Garantir orzamento comunitario para o mantemento de axudas, con topes máximos, por activos agrarios, non por hectáreas nin cabezas de gando, establecendo un plus para aqueles activos que ademais produzan alimentos en zonas agroclimaticamente desfavorecidas.