O vindeiro mércores 17 de abril, as organizacións integradas na coordinadora global La Vía Campesina conmemoramos o Día Internacional das Loitas Labregas, unha xornada de acción global que nos reúne para lembrar ás vítimas da masacre de Eldorado do Carajás (Brasil) en 1996 e pór en valor a resistenza do campesiñado en todo o mundo e a nosa loita pola xustiza social e a dignidade.
Multitude de accións reivindicativas e eventos terán lugar ao longo dos case un cento de países onde LVC ten presenza a través das súas 182 organizacións integrantes. Dende o Sindicato Labrego Galego-Comisións Labregas (SLG-CCLL) desenvolveremos o espazo “Voces labregas que loitan pola terra”, un conversatorio online na que daremos a coñecer experiencias de loita na Galiza fronte ao acaparamento de terras e a depredación de recursos no medio rural .
O 2024 comezou coas masivas protestas en Europa, Asia e outras partes do mundo contra políticas as agrícolas lesivas para o campesiñado. Estas manifestacións non se limitan a buscar prezos xustos e unha vida digna para as persoas produtoras de alimentos, senón que tamén expresan a necesidade dunha sociedade orientada cara a un futuro onde prevaleza o modelo de produción agroecolóxico sobre as prácticas destrutivas do agronegocio e que se garanta a xustiza social e a dignidade de todxs.
As nosas loitas campesiñas, arraigadas fondamente nos principios da Soberanía Alimentaria, procuran establecer un sistema inclusivo que promova as economías rurais e os medios de vida das persoas labregas. Recoñecendo a Soberanía Alimentaria, a Agroecoloxía Campesiña, o acceso popular á terra, ao territorio e aos bens comúns como solucións xenuínas ás crises globais.
O movemento labrego global LVC avogamos pola implementación da Declaración das Nacións Unidas sobre os Dereitos do Campesiñado e outras Persoas que Traballan en Zonas Rurais (UNDROP), un instrumento internacional crucial para abordar as crises multifacéticas que enfrontan o campesiñado. Ademais, demandamos o establecemento dun novo marco de comercio internacional baseado na cooperación e a Soberanía Alimentaria para desafiar o sistema de comercio neoliberal que perpetúa a fame.
Simultaneamente, estamos a prepararnos para o Foro Mundial Nyéléni en 2025, que convocará ao movemento internacional pola Soberanía Alimentaria para enfrontar os desafíos da fame e a pobreza mediante o avance do desenvolvemento e o fortalecemento das economías locais.
Este 17 de abril, ocuparemos todos os espazos para reafirmar con contundencia a nosa vontade por fortalecer a Soberanía Alimentaria nos nosos territorios. Animamos a todos xs membros, aliadxs e simpatizantes da Via Campesina a mobilizarse e conmemorar esta data, unidxs nunha soa voz de solidariedade para apoiar as loitas campesiñas contra as crises globais.
17 Xuñ 2025
13 Xuñ 2025
30 Mai 2025
28 Mai 2025
27 Mai 2025
23 Mai 2025