Novas

17 de abril: Liberemos aos labregos e ás labregas de tratados de libre comercio como Mercosur, CETA ou TTIP!

• 05,Abr 2018
• Posted By : sicom
• 0 Comments

As violacións dos dereitos fundamentais dos labregos e das labregas que, por desgracia, acontecen a diario, medran agora polos tratados de libre comercio (TLC) que están, exclusivamente, ao servizo das multinancionais.

Trátase de acordos comarciais asentados e acadados por grandes investidores privados que, coa axuda de tribunais privados de arbitraxe, pasan por riba das normas e as leis dos estados, apoderándose das terras, sementes, auga, bosques, recursos mineiros, materias primas agrícolas e mesmo dos coñecementos labregos, desatando unha carreira desenfreada cara á mingua das súas rendas.

O TLC que se está a negociar actualmente entre a Unión Europea e Mercosur é un exemplo disto. En nome dunha ilusoria “competencia libre e non distorsionada”, este TLC quere impoñer a importación de enorme cantidades de produtos libres de impostos, como 100.000 toneladas de carne de vacún e 90.000 toneladas de aves de curral, entre outros. Un golpe fatal para nós, labregos e labregas que vivimos unha situación de crise. Pero este acordo tamén xeneraliza o dumping social e ambiental: a expansión da agroindustria en detrimento das comunidades labregas, maior deforestación, monocultivos, consolidación dos transxénicos e impactos nociovs nos dereitos labregos.

Este acordo, do mesmo xeito que o CETA ou o TTIP e outros TLC negociados pola UE, tamén pon en perigo aos consumidores e consumidoras ao atacar o principio de precaución e barreiras non arancelarias como as normas de seguridade sanitaria dos alimentos, cuxo recoñecemento é froito de longos anos de loitas da cidadanía.

Os labregos e as labregas do mundo somos as primeiras vítimas das políticas de libre comercio e sentímonos como unha moeda de cambio ou unha simple variable nas negociacións en curso. A través de La Vía Campesina, denunciamos unha carreira frenética por producir máis ao menor custe. Europa, incapaz de reformar profundamente unha política agraria común, inxusta e ilexítima; incapaz tamén de garantir unha renda aos traballadores e ás traballadoras da terra; ou de preservar o medio ambiente e o clima; pretende resolver estes retos mediante a exportación. Xa é hora de denunciar esta fraude e apostar pola soberanía alimentaria.

Liberemos aos labregos e labregas do libre comercio!

Gandeiros e gandeiras! Labregos e labregas! Cidandáns e cidadás! Unámonos en Bruxelas o 17 de abril contra o acordo da Unión Europea con Mercosur e contra outros acordos tóxicos!